长波理论有助分析中长线

　　作为长线投资者，最重要系找寻真正嘅底同真正嘅顶，尤其系房地产，因为买卖比较困难兼佣金大（例如英国佣金系楼价3％，一出一入已唔见6％）。呢方面可参考周期理论，股市有最著名嘅二十四个月周期及四十个月周期，两者重叠高峰期系2007年第三季，低潮系2008年第四季；下一高峰期系2010年第一季。

　　换言之，长线客应在响去年第三季出货、 2008年第四季入货、2010年第一季再出货。六十年长波理论用于分析债券最有用，上一个利率高峰期系1980年，低潮响2008年年中，即我地正进入利率低潮期。2008年下半年到2030年第四季系利率向上期，我地正处低利率期，估计响今年6月至8月见底，然后进入长达二十二年嘅利率上升期。至于商品价格上一个低潮系1996年，由1997年开始至2010年第一季系商品价格上升周期，然后又回落。

　　对长波理论有认识（唔系波浪理论）有助分析中长线，呢方面嘅权威系「Foundation for the study of cycles」。七十年代后期我老曹开始接触，由于长波理论以「季」为单位，同近年流行嘅短命分析格格不入，响分析界唔太流行。

　　事实证明，长波理论协助我老曹捕捉到英国楼市低潮同高潮，同时捕捉到2000至07年嘅商品价格上升周期（理论上2010年第一季才见顶），以及2007年10月恒生指数见顶回落……。如各位做长线投资，长波理论十分有用，请减少睇嗰D短命分析。

要喺投资市场赚钱，除咗须学晓good stock picks及time the market外，仲要严守纪律（止蚀唔止赚）。喺熊市一期，二线股跌幅最大；喺熊市二期，二线股反弹最乏力；但到熊市三期，二线股反而跌幅最细。喺熊市一期，大价股抗跌力最强；喺熊市二期，大价股反弹力最好；但到咗熊市三期，大价股跌幅反而最大。换言之，要到大价股急跌而二线股唔跌（或小跌），才系熊市三期，估计响今年第四季或明年第一季才出现。